რა ტიპის ქვეწარმავლებია გავრცელებული საქართველოში და როგორ ამოვიცნოთ შხამიანი გველი

ქვეწარმავლების გავრცელება ტემპერატურის მატებასთან ერთად დაიწყო. ბოლო ორი თვის განმავლობაში, "ცხოველთა მონიტორინგის სააგენტოში" 450-მდე ზარი დაფიქსირდა. რეაგირების შედეგად ეკიპაჟებმა 200-ზე მეტი გველი დაიჭირეს.

"ცხოველთა მონიტორინგის სამსახურის" ხელმძღვანელის, თემურ ფხალაძის განმარტებით, ზოგიერთი მათგანი შხამიანიც აღმოჩნდა. მისი თქმით, ქვეწარმავლის აღმოჩენის შემთხვევაში, 112-ზე აღნიშნული სამსახურის გამოძახება 24 საათის განმავლობაში შეგიძლიათ.

ქვეწარმავლები თბილისის ყველა უბანში ფიქსირდება, მათ შორის გლდანში, ორთაჭალის მიმდებარე ტერიტორიაზე, დიღომში.

"თბილისის თითქმის ყველა უბნიდან თანაბრად გვიკავშირდებიან, ჩვენი ეკიპაჟები შესაბამისი აღჭურვილობით შემთხვევის ადგილზე მიდიან და შესაბამის სამუშაოებს ატარებენ. იმ ტერიტორიის სპეციალური ხსნარით შეწამვლა, სადაც არ გვინდა, რომ გველმა დაიბუდოს, ჩვენც შეგვიძლია. ამ ხსნარების რეალიზაცია თბილისში ბევრ მაღაზიაში ხდება," - განმარტავს თემურ ფხალაძე.

სპეციალისტების რეკომენდაციით, ქვეწარმავლის აღმოჩენის შემთხვევაში, გადაწყვეტილების თვითნებურად მიღებას შესაძლოა, უარყოფითი შედეგები მოჰყვეს, ამიტომ უმჯობესია, თბილისის ზოოპარკის ეგზოტერიუმის თანამშრომლის, თეკლა კვაჭაძის რჩევები გავითვალისწინოთ.

მისი თქმით, საქართველოში 22-ზე მეტი სახეობის გველია გავრცელებული, აქედან 4 მათგანი, გიურზა, ცხვირრქოსანი გველგესლა, ველის გველგესლა და კაზნაკოვის გველგესლა შხამიანია, დანარჩენები კი აბსოლუტურად უვნებლები არიან.

როგორ ამოვიცნოთ შხამიანი გველი და რა პროცედურებს მივმართოთ მისგან თავდაცვის მიზნით?

თეკლა კვაჭაძის თქმით, გიურზას შედარებით მკვრივი სხეული აქვს, რომელიც თავისგან გამოყოფილია. მისი თავი სამკუთხედი ფორმისაა, ამ სახეობის ქვეწარმავალი ძირითადად, ნაცრისფერია, თუმცა ასეთი შეფერილობა ანკარებსაც დაკრავს.გიურზა ძირითადად, აღმოსავლეთ საქართველოში, კახეთშია გავრცელებული, თუმცა რამდენჯერმე თბილისშიც აღმოაჩინეს.

"რაც შეეხება დანარჩენ სამ შხამიან გველს, ისინი ადამიანის სიცოცხლისთვის უვლებლები არიან, თუმცა ჯანმრთელობას მეტ-ნაკლებად ზიანს მაინც აყენებენ, 

ქვეწარმავლის აღმოჩენის შემდეგ მას საგნების სროლა არ უნდა დავუწყოთ, რადგან ამით მხოლოდ გავაღიზანებთ. ფრთხილად უნდა დავიხიოთ ერთი ნაბიჯით უკან და ტერიტორიას, რომელიც საფრთხის შემცველია, ნელი ნაბიჯებით შემოვუაროთ.

თუ გველმა გვიკბინა, გარდა იმისა, რომ სასწრაფო უნდა გამოვიძახოთ, აუცილებელია ჰორიზონტალური მდგომარეობის მიღება და დიდი რაოდენობით წყლის მიღებაც.

დაუშვებელია, ნაკბენის არტახებით გადახვევა, გამოწოვა და მსგავსი პროცედურები.

"გველები კორპუსებში იმიტომ შედიან, რომ სადარბაზოებში ანტისანიტარიაა. ვირთხები მრავლდებიან, რომლებიც ქვეწარმავლების საკვებს წარმოადგენენ, ზაფხულში ბინებში გველებსაც ამიტომ ვპოულობთ-ხოლმე," - აღნიშნავს ეგზოტერიუმის თანამშრომელი.

თეკლა კვაჭაძის განმარტებით, გველების თავშესაფარი ძირითადად, მაღალი ბალახია, ისინი მზიან ამინდში გამოდიან, თუმცა ნალექის დროს მათი სოროები ივსება და საცხოვრებლის დატოვება უწევთ, შესაბამისად, კითხვაზე, რატომ მრავლებიან გველები წვიმაში, პასუხი სწორედ ესაა. კიდევ ერთი რეკომენდაცია, რომელსაც სპეციალისტები გვაძლევენ, ეზოების სამშენებლო ნარჩენებისგან განთავისუფლებაა, რათა ქვეწარმავლებს ბუდეები არ მოვუწყოთ, რამაც შესაძლოა, ჩვენს სიცოცხლეს საფრთხე შეუქმნას.



მარიამ მენაბდიშვილი