ონის მაჟორიტარმა დეპუტატმა, გია ჯაფარიძემ პარლამენტის ორი კომიტეტის გაერთიანებულ სხდომაზე დენის აპარატებით თევზაობის "ამოძირკვა" და სათანადო ზომების გატარება მოითხოვა. 
როგორც დეპუტატმა განაცხადა, წინა ხელისუფლების დროს ონის მუნიციპალიტეტში დენით თევზაობა გამძაფრდა, მაშინ სულიერმა მოძღვარმა - მღვდელმა დაიბარა ყველა, ვისზედაც ეჭვი არსებობდა - პოლიციის უფროსის ხელმძღვანელობით და შეაჩვენა. პარლამენტის წევრი ამბობს, რომ "ამან ცოტა ხნით რაღაცნაირად უშველა". 
"პირადად მე მონადირის, მეთევზის შვილი ვარ და თვითონაც მიყვარს მსგავსი გართობა, მაგრამ ეს არის უბრალოდ ჟლეტა და გაწყვეტა იმ საოცარი, ულამაზესი თევზისა, რასაც კალმახი ჰქვია. მოგეხსენებათ, დენის აპარატით თევზაობის დროს იჭერენ არა მხოლოდ მოზრდილ კალმახს, რომლის შეჭმაც შეიძლება, არამედ აბსოლუტურად ყველა კალმახი - დიდიც და პატარაც წყდება. ეს არის გენოციდი", - განაცხადა ჯაფარიძემ და აქვე აღნიშნა, რომ თუკი ზომები არ იქნება მიღებული "კალმახს მარტო სურათში ვნახავთ".