თბილისის საკრებულოს გარემოს დაცვის კომისიის თავმჯდომარის, შორენა ბუხრაშვილის თქმით, იარაღის ტარება-გამოყენების წესი იარაღის შესახებ კანონით რეგულირდება და საკრებულოს არ აქვს უფლება, მისი გამოყენების უფლება ვინმეს მიანიჭოს, შესაბამისად, „ცხოველთა მოვლა-პატრონობის წესი იარაღის გამოყენების უფლების მინიჭებას არ ითვალისწინებს".

მისი განმარტებით, „იმედის კვირაში" გავრცელდა არასწორი ინფორმაცია, თითქოს საკრებულო გეგმავს, დაჩქარებული წესით განიხილოს ცხოველთა მოვლა-პატრონობისა და მათი პოპულაციების მართვის წესის შესახებ პროექტი, გავრცელებული ინფორმაცია კი საზოგადოების შეცდომაში შეყვანას ისახავს მიზნად. ბუხრაშვილის თქმით, გადაცემის მსვლელობისას მან პირდაპირ ეთერში ჩართვა მოითხოვა, რაზეც უარი მიიღო, ამასთან, გადაცემაში არ გასულა განმარტებები, რომლებიც კომისიის თავმჯდომარემ ჟურნალისტს გადაცემის ეთერში გასვლამდე მისცა.

„გარემოს დაცვის კომისიის ინიციატივით, საკრებულოში მოვიწვიეთ არაერთი არასამთავრობო ორგანიზაცია, რომელთა შენიშვნებსა და რეკომენდაციებს აუცილებლად გავითვალისწინებთ აღნიშნულ პროექტში. ხაზი მინდა გავუსვა იმასაც, რომ პროექტის საბოლოო ვერსია, რომელიც ცხოველების მოვლა-პატრონობისა და პოპულაციების მართვის წესს ითვალისიწინებს, ჯერ არ დამტკიცებულა", - ამბობს შორენა ბუხრაშვილი.

კომისიის თავმჯდომარის თქმით, ახალი წესის მიღება გამოიწვევს საკრებულოს მიერ 2012 წელის 31 აგვისტოს დამტკიცებული წესის გაუქმებას.

„მინდა შევახსენო ჩემს ყოფილ კოლეგას, ქალბატონ ინგა გრიგოლიას, რომ ეს სწორედ ის პერიოდია, როდესაც იგი თბილისის მუნიციპალიტეტის საკრებულოს წევრი გახლდათ. სხდომაზე, რომელსაც ქალბატონი ინგა გრიგოლიაც ესწრებოდა, მიიღეს პროექტი, რომლის მეცხრე მუხლი „ცხოველების მოკვდინებით“ სათაურდება და გვეუბნება, რომ მოკვდინებას ექვემდებარებიან ის ცხოველები, რომელთაც კომპეტენტური ვეტერინარის დასკვნის საფუძველზე დაუდგინდებათ ადამიანისათვის საშიში დაავადება. მუხლში ასევე ნათქვამია, რომ ცხოველის მოკვდინება დასაშვებია ვეტერინარის მიერ ცხოველთა თავშესაფარში და უნდა ჩატარდეს მყისიერად, ცხოველისთვის ფიზიკური თუ სულიერი ტანჯვის რაც შეიძლება ნაკლებად მიყენებით. დოკუმენტი ერთხმად, ოცდათოთხმეტი ხმით არც ერთის წინააღმდეგ დამტკიცდა“, - განაცხადა შორენა ბუხრაშვილმა.