"მწყემსმა თოფით ივარაუდა, რომ ცხედარი შეიძლება დაკარგული მონადირეებიდან ერთ-ერთი ყოფილიყო"

საზოგადოებას ალბათ ახსოვს წლის დასაწყისში კახეთში დაკარგული სამი მონადირის ამბავი, რომელთაც სამაშველო სამსახური, ადგილობრივ მოსახლეობასთან ერთად, დიდი ხნის განმავლობაში უშედეგოდ ეძებდა... რამდენიმე დღის წინ ცნობილი გახდა, რომ კახეთის მთებში  მწყემსმა მამაკაცის ცხედარი იპოვა, მაშველებმა მისი ჩამოსვენება შეძლეს. ცხედარს ამ დროისთვის ექსპეტიზა უტარდება. ცხედართან ერთად თოფიც ნახეს, სწორედ ამიტომ ივარაუდეს, რომ შესაძლოა გარდაცვლილი დაკარგული მონადირეთაგანი ყოფილიყო. როგორც სოფელ მსხალგორის გამგებელის მოადგილე,გიორგი ბოკერიამ გვითხრა, 8 ივნისს, დილით, მაშველებმა მიმდებარე ტერიტორიაზე კიდევ ერთი ცხედარი ნახეს. სავარაუდოდ, გარდაცვლილი ასევე დაკარგული მონადირე უნდა იყოს. 
ოთხი მონადირე: ავთო და დათო სამხარაძეები, ლევან ჯალალოვი და გიორგი თურქაძე კაბალის ხევში სანადიროდ 28 დეკემბერს წავიდნენ, მათგან შინ მშვიდობით დაბრუნება მხოლოდ გიორგი თურქაძემ შეძლო, რომელმაც ამინდის გაუარესებას გამოასწრო. მისი თქმით, საკვები დატოვეს, რადგან ამინდი ერთბაშად უარესდებოდა და ზედმეტი ბარგი თავიდან მოიცილეს, რათა თავისუფლად ევლოთ. გზაში ქარბუქმა ისინი დაფანტა. "მათი ხმა მესმოდა, მეც ვეძახდი აქედან, შემდეგ კი, თანდათან მიიკარგა, თოფიც ვისროლე, რომ ხმა მიმეწვდინა, მაგრამ პასუხი არ გამიგიაო..."- ყვებოდა ის თვეების წინ.

მოგვიანებით, გავრცელდა ინფორმაცია, რომ მონადირეები დაღესტნის საზღვარზე დააკავეს, მაგრამ შსს-მ ეს ინფორმაცია მალევე უარყო. 

მერაბი, სოფელ მსხალგორში მცხოვრები:
- მწყემსის თქმით, რომელმაც ცხედარი იპოვა, გარდაცვლილი სამხედრო ფორმით იყო. როგორც ვიცით, სამიდან სამხედრო ფორმა ლევან ჯალილოვს ეცვა. მან დაკარგვამდე ცოტა ხნით ადრე თავისი ფოტო სოციალურ ქსელში დადო, რომელზეც სამხედრო ფორმა აცვია. შესაძლოა, სხვა ბიჭებსაც ფორმა ეცვათ, რთული ჯერ რაიმეს თქმა. 

გიორგი ბოკერია, ლაგოდეხის მუნიციპალიტეტის სოფელ მსხალგორის გამგებლის მოადგილე:
- იმ მიდამოებში, სადაც ცხედრებია ნაპოვნი, იალაღებია და მწყემსები რჩებიან. თავდაპირველად ერთ-ერთმა  მწყემსმა იპოვა ცხედარი და ის დაუკავშირდა შესაბამის სამსახურს. თოფი უნახავს და მაგით ივარაუდა, რომ გარდაცვლილი დაკარგული მონადირეებიდან ერთ-ერთი იქნებოდა...  სამაშველოს ბიჭები, ადგილობრივებთან ერთად, მწყესმის მიერ მოწოდებული ინფორმაციის საფუძველზე ავიდნენ და როგორც ვიცი, მას შემდეგ ძებნა არ შეუწყვეტიათ... დღეს მითხრეს, რომ სწორედ მაშველებმა იპოვეს კიდევ ერთი ცხედარი, თუმცა ჯერ დანამდვილებით თქმა ვინ ვინ არის, რთულია. სოფლიდან იმ კონკრეტულ ადგილამდე მისვლას, სადაც ცხედრები ნახეს, 15 საათი სჭირდება. 

მარინა გელაშვილი, ერთ-ერთი დაკარგული მონადირის, ლევან ჯალალოვის დედა:
- არ ვიცი. რა ჰქვია ჩემს მდგომარეობას, ამდენი ხანი შვილი არც ცოცხალი მეღირსა და არც მკვდარი. მაინც ელოდება დედის გული, იქნებ ჯერ კიდევ ცოცხალია ჩემი ბიჭი... ორი წელი პოლონეთში ცხოვრობდა და მუშაობდა ჩემი ლევანი. ახალ წლამდე რამდენიმე დღით ადრე ჩამოვიდა საქართველოში, იქიდანვე ემზადებოდა ნადირობისთვის და როგორ არ გამეშვა... ბავშვობიდან დადიოდა სანადიროდ და გამოცდილებაც ჰქონდა. 30 დეკემბერს ვესაუბრე ბოლოს, - ახალ წელს სახლში ვიქნებიო, ჩემს გოგოსაც ელაპარაკა... უცხოეთიდანაც კი აქაურ მთებს ეფერებოდა. სიგიჟემდე უყვარს თავისი კუთხე, საქართველო. სული კბილით ეჭირა, ვიდრე ჩამოვიდოდა... ამ ხნის განმალობაში გზას გავყურებდით. ლევანიმ იცოდა მთა, ნადირობა, რთული კლიმატი, ამის იმედი მქონდა... ახლა ყველა დაკარგული მონადირის ოჯახი გულის კანკალით ელოდება ექსპერტიზის პასუხს... 

ლალი პაპასკირი