"ძაღლი სარდაფიდან გამოვარდა, კისერში იყო დაჭრილი, საბრალო აქეთ-იქით ეხეთქებოდა და გზადაგზა სისხლის გუბეს აყენებდა, მერე მეზობელ ეზოში შევარდა და იქ ბავშვების თვალწინ დალია სული."

"ლომინაშვილმა ლეკვები გამოგვგლიჯა, სადღაც წაათრია, მოკლული ძაღლი კი ხევში გადააგდო"

საქართველოს ცხოველთა დაცვის ასოციაციის განცხადებით, 14 ივლისს მანგლისში შემაძრწუნებელი ფაქტი მოხდა - ვალერი ლომინაშვილმა ცეცხლსასროლი იარაღით მოკლა ძაღლი, ძუ, რომელსაც 11 ჯერ კიდევ თვალებაუხელელი ლეკვი ჰყავდა. ორგანიზაციის თავმჯდომარის, ვახტანგ მამალაძის თქმით, ამაზრზენი მკვლელობა 8 წლის გოგონას თვალწინ მოხდა. ფაქტის შესახებ პოლიციას აცნობეს, თუმცა, როგორც მამალაძე და ტრაგედიის თვითმხილველი ინგა ცუცქირიძე აცხადებენ,გამომძიებელი გიორგი გაბრიჩიძე ცდილობს, ფაქტი მიჩქმალოს და სისხლის სამართლის კოდექსის 259-ე მუხლის მიხედვით საქმე არ აღძრას. ცხოველთა დაცვის ასოციაცია შს მინისტრისადმი სპეციალურ მიმართვაზე ხელმოწერებს აგროვებს და დანაშაულის ფაქტზე მკაცრ რეაგირებას მოითხოვს. 

ვახტანგ მამალაძე მიიჩნევს, რომ 259-ე მუხლი საზოგადოების პასიურობის გამო მკვდარია. "მუხლი რომელიც ჩვენს ქვეყანაში, წესით, ცხოველთა უფლებებს უნდა იცავდეს, არ მოქმედებს. ამიტომ მოგიწოდებთ ყველას, როდესაც შეესწრებით ცხოველის უფლებების ხელყოფას, გამოიძახეთ პატრული. შესაბამისად, ჩვენი აქტიურობით ეს მუხლიც გააქტიურდება".

ინგა ცუცქირიძე შვილებთან ერთად მანგლისში სააგარაკოდ ჩავიდა: 

- იმ ეზოში, სადაც ჩვენ ვცხოვრობდით, ცხოვრობდა ძაღლი, რომელმაც სარდაფში 11 ლეკვი დაყარა. სახლის პატრონი სამი დღე იმუქრებოდა, უნდა დავხოცოო.შეშფოთებულმა ვთხოვე, ნუ დახოცავთ, დარეკეთ შესაბამის სამსახურში და წაიყვანენ თავის ლეკვებიანად. ძაღლს რომ მოკლავთ, ხომ პატარებიც დაიღუპებიან-მეთქი. ნასვამი იყო და ჯიუტად იმეორებდა, უნდა მოვკლაო. ამ ამბიდან ოთხი დღე გავიდა, თითქმის მიმავიწყდა ეს ამბავი, რომ გათენებისას გასროლის ხმა გავიგონე.შეშინებული გარეთ გამოვვარდი, ჩემი გოგონა აივანზე გაქვავებული იდგა, ეზოში კი სახლის პატრონი და კიდევ ერთი კაცი შევნიშნე. სახლის პატრონს ხელში იარაღი ეჭირა, მეორე კი ასწავლიდა, როგორ გამოეყენებინა იარაღი. ძაღლი სარდაფიდან გამოვარდა, კისერში იყო დაჭრილი, საბრალო აქეთ-იქით ეხეთქებოდა და გზადაგზა სისხლის გუბეს აყენებდა, მერე მეზობელ ეზოში შევარდა და იქ ბავშვების თვალწინ დალია სული. სანახაობით შეშინებულმა ბავშვებმა კივილი ატეხეს. მოგვიანებით ლეკვები გამოვიყვანეთ, რძე დავალევინეთ, მაგრამ მოვარდა ის კაცი, ლეკვები გამოგვგლიჯა, სადღაც წაათრია, მოკლული ძაღლი კი ხევში გადააგდო. ასეთი საშინელება არასოდეს მინახავს. 

- ვისი იყო ეს ძაღლი, იმ კაცის?
- ამბობენ, ძაღლი მეზობლის მდგმურმა დატოვა და ამ სარდაფში დაიბუდაო. არავის აწუხებდა და თუნდაც შეეწუხებინა, ხომ ვთხოვეთ, რომ შეიძლებოდა შესაბამის სამსახურებს წაეყვანათ თავის ლეკვებიანად? ჩვენც არ გვაცალა ამის გაკეთება. როგორც გავიგე, ის იარაღი სხვისი ყოფილა. იქ როგორღა დავრჩებოდით, რაც იქ ვნახეთ, ვერასოდეს დავივიწყებთ, იქ რა გაგვაჩერებდა, იმ კაცის გვერდით როგორ შეიძლებოდა ყოფნა? როგორც ის მოიქცა, ასე მხოლოდ არაადამიანი შეიძლება მოიქცეს. გაოგნებული ვარ, რატომ უნდა გწყუროდეს ძაღლის სისხლი და 11 უმწეო ლეკვის ტანჯვით სიკვდილი? 

- პოლიციას რა რეაგირება ჰქონდა?
- ეს დანაშაულად არც ჩათვალეს. იმ არაკაცს იცნობენ. პოლიციაში როგორც კი ვთქვი, იმ სახლში ერთი წუთითაც არ გავჩერდები-მეთქი, სანამ პოლიციიდან სახლამდე მივედი, იმ არაადამიანს პოლიციელის თანდასწრებით ჩემი ნივთები გარეთ გამოეყარა. თანხის დაბრუნება რომ მოვითხოვე, სასაცილოდ არ ეყოთ. პოლიციას რომ მივმართე, თბილისში შემომითვალეს, მანგლისში ჩამოდით და აქ ვილაპარაკოთო. რამდენჯერ უნდა დამკითხონ, ყოველდღე მანგლისში უნდა ვიარო? 

მაშინ ისეთი შეძრწუნებული ვიყავი ვწუხვარ, რომ მოკლული ძაღლი არ გადავიღე ან ლეკვები დამეფიქსირებინა კადრში. წარმოიდგინეთ ჩემს ადგილას თქვენი თავი, შვილებთან, თანაც ჩვილთან ერთად მიდიხარ დასასვენებლად და ხედავ, როგორ დაშლიგინობს თოფიანი კაცი და სისხლიან სანახაობას უწყობს ბავშვებს.რომ არ გავგიჟდი, ესეც მიკვირს. პოლიციაში სულ დეტალურად აღვწერე ყველაფერი, მაგრამ შედეგი არ ჩანს".

ეკა ლომიძე (სპეციალურად საიტისთვის)