თელავის, სენაკისა და ბაღდათისმუნიციპალიტეტებმა მთავრობის განკარგულებით, მგლების დახოცვის უფლება მიიღეს. ამის შესახებ საქართველოს მთავრობის ადმინისტრაციის ვებგვერდზე გამოქვეყნებული განკარგულებებით ირკვევა.

ამასთან, სენაკის მინიციპალიტეტში მგლებთან ერთად, ნებართვა ტურების დახოცვაზეც მიიღეს.

როგორც „ლიბერალთან“ საუბრისას გარემოსა და ბუნებრივი რესურსების დაცვის სამინისტროს ბიომრავალფეროვნების დაცვის სამსახურის უფროსი სოსო ქარცივაძე ამბობს, საკითხი რეგიონებში მგლების თავდასხმის შემთხვევების გამო დააყენეს, რა დროსაც მტაცებელმა მოსახლეობას შინაური პირუტყვი გაუნადგურა.

როგორც ის ამბობს, სანამ ამგვარი უფლებამოსილების დელეგირებულ საკითხს დააყენებენ, ალტერნატიულ გზებსაც განიხილავენ ხოლმე, თუმცა ამჯერად ყველაზე ეფექტიანი მათი დახოცვის გადაწყვეტილება იყო.

რაც შეეხება დასახოცი მტაცებლის რაოდენობას, ქარცივაძის თქმით, თელავის შემთხვევაში საუბარია 7 მგელზე, სენაკისა და ბაღდათის შემთხვევაში კი - 10-10 ზე, ასევე ათია ტურის რაოდენობაც.

როგორც „ლიბერალთან“ საუბრისას სახეობათა კონსერვაციის ცენტრ „ნაკრესის” თავმჯდომარე ბეჟან ლორთქიფანიძე ამბობს, საქართველოში არ არის თავშესაფრები, რომ პრობლემური ცხოველები იქ მოათავსონ და ამით, მათი დახოცვა თავიდან აირიდონ.

მისივე თქმით, მგლების პოპულაცია საქართველოში ცოტა არ არის, თუმცა მათი ზუსტი რაოდენობაც არავინ იცის.

ბეჟან ლორთქიფანიძის თქმით, საჭიროა დაინერგოს პრევენციული ღონისძიებები, რადგან დახოცილი მგლების ადგილი შესაძლოა, ცოტა ხანში სხვა მგლებმა დაიკავონ.

„შესაბამისად, თავდასხმები არ შეჩერდება. შეიძლება იმ წამს ამოიღონ ინდივიდები, მაგრამ იმისათვის, რომ პრობლემა გადაიჭრას, პრევენციული ღონისძიებებია საჭირო, ან კარგი ძაღლების მოშენება, რომ დაიცვას საქონელი, ან საჭიროა მწყემსი, ასევე ელექტროღობეების შემოღება და ა.შ. საკმაოდ ბევრი სპექტრია, რომლებიც საშუალებას გვაძლევს, პრობლემა  თავიდან ავიცილოთ. სრულად კი პრობლემას ვერ აღმოიფხვრება იმიტომ, რომ მტაცებელი ადამიანის თანაცხოვრებასთან ყოველთვის კონფლიქტში იყო, მაგრამ იმისათვის, რომ პრობლემა ან ბუნებაზე პრესი შევამციროთ, რასაკვირველია, მარტო ამოღება საკმარისი  არ არის“, - აცხადებს ლორთქიფანიძე.