შვეიცარიაში განთავსებული ავტორიტეტული ორგანიზაციის, ბუნების მსოფლიო ფონდის (WWF) მიერ გავრცელებული ახალი ანგარიშის თანახმად, ნახევარ საუკუნეზე ნაკლებ დროში მსოფლიოში ველურ ცხოველთა რაოდენობა 50%-ზე მეტით შემცირდა.
დოკუმენტი, რომელსაც „ცოცხალი პლანეტის ანგარიში 2014“ ეწოდება, 30 სექტემბერს გავრცელდა და შეისწავლის ძუძუმწოვრების, ფრინველების, ქვეწარმავლების, ამფიბიების და თევზების 10,000 სახეობაზე მეტს.
ორგანიზაციის თანახმად, 1970-დან 2010 წლამდე ბიომრავალფეროვნების მკვეთრი შემცირების მიზეზი ადამიანის მხრიდან ბუნების მზარდი ექსპლუატაციაა.