როგორც სრულიად საქართველოს კათოლიკოს-პატრიარქმა, უწმინდესმა და უნეტარესმა ილია მეორემ საკვირაო ქადაგებისას ბრძანა, საჭიროა ლოცვა გაძლიერდეს და აღნიშნული გადაწყვეტილებაც ამისთვის იქნა მიღებული.

პარაკლისები ორშაბათიდან დაიწყება. ამ დღეს წმინდა სამების პარაკლისი საქართველოს კეთილდღეობისა და გადარჩენისთვის გადაიხდება.

"ვეცდები რომ ამ პარაკლისზე აუცილებლად ვიყო. ვფიქრობ, მთელი მცხეთა-თბილისის სამღვდელოებაც უნდა მოვიდეს, რომ ქვეყნისთვის ვილოცოთ",- აღნიშნა უწმინდესმა.

სამშაბათობით ასევე წმინდა სამების პარაკლისი აღევლინება ბავშვებისთვის. პატრიარქის განმარტებით, ეს ბავშვების დღე იქნება, ოთხშაბათს ჯვრის პარაკლისი ავადმყოფებისთვის აღევლინება, ხუთშაბათობით წმინდა ღვთისმშობლის პარაკლისი, ეკლესიის კეთილდღეობისა და ერის მშვიდობისთვის, ხოლო პარასკევ დღეს ყოველთა წმინდათა პარაკლისი აღევლინება, ასევე ერისა და ეკლესიის გაძლიერებისთვის.

რაც შეხება შაბათ დღეს, პანაშვიდი გადაიხდება მიცვალებულთათვის, ხოლო კვირა დღეს წმინდა სამების პარაკლისი მსოფლიოში მშვიდობისთვის აღევლინება.

"თქვენ იცით რამდენად არეულია მსოფლიო, მსოფლიოს მშვიდობისთვის ლოცვის გაძლიერება აუცილებელია",- აღნიშნა უწმინდესმა.

ილია მეორის განმარტებით, პარაკლისების გადახდა დღეიდან ვერ დაიწყება იმ მიზეზით, რომ სამებაში დღეს ჩვილთა საყოველთაო ნათლობაა.