მონადირეების საიტი - კავკასიური როჭო

კავკასიური როჭო

ტაქსონომიური შენიშნვები

კავკასიური როჭო საშუალო ზომის ფრინველია. სხეულის სიგრძე 50 სმ-მდეა. წონა - 600 – 1100 გრამი. მამალი დედალზე დიდია და შეფერილობითაც განსხვავდება. ორწლიანი და მეტი წლის მამალი სრულიად შავია, მხოლოდ იღლიის ბუმბულები აქვს თეთრი, ტვალებს ზემოთ შეშველი კანი (წარბი) კი წითელია. დედალი როჭო კი ჩალისფერია, მუქი მოყავისფრო განივი წინწკლებით.
როჭოებისათვის დამახასიათებელია აგრეთვე ასაკობრივი დიმორფიზმი. ერთწლიანი მამალი შეფერილობით დედალს ჰგავს, მაგრამ მასთან შედარებით ყავისფერი წინწკლები უფრო წვრილი და ხშირი აქვს. ახალგაზრდა მამალი საბოლოოდ მხოლოდ ზრდასრულობის მიღწევისას, მესამე წელს იფარება შავი ბუმბულით.

ნუსხაში შეტანის მიზეზები

მცირე/კლებადი პოპულაცია.

გავრცელება

საქართველოში როჭო როგორც დიდ ისე მცირე კავკასიონზე გვხვდება. დიდ კავკასიონზე როჭო შეიძლება ვნახოთ აფხაზეთის მთებში, სვანეთში,რაჭა-ლეჩხუმში,სამაჩაბლოს მთიანეთში, ხევში, მთიულეთში, ხევსურეთში, თუშეთში და კახეთის კავკასიონზე. მცირე კავკასიონზე კი თრიალეთის, მესხეთის, ერუშეთის, შავშეთის და არსიანის ქედებზე.
საქართველოს გარეთ როჭო ჩრდილო კავკასიაში დიდი კავკასიონის ქედის გაყოლებით ბინადრობს, აზერბაიჯანის დიდ და მცირე კავკასიონის ქედებზე, სომხეთში ზანგიზურის, მეღრის ქედებზე, თურქეთში შავი ზღვის ქედზე და მიმდებარე მთებში და ირანის უკიდურეს ჩრდილო დასავლეთ ნაწილში.

ეკოლოგიური თავისებურებები

კავკასიური როჭო მთის ფრინველია. მისი ადგილსამყოფელო ზღვის დონიდან 1500 - დან 3000 - მ-მდე სუბალპურ და ალპურ სარტყლებშია. ამ ფრინველისათვის განსაკუთრებით მნიშვნელოვანი საბინადრო ადგილებია დეკის ბუჩქნარები, სუბალპური ტყე, არყნარები და მათშორის არსებული მინდვრები.

ძირითადი საფრთხეები

სახეობაზე მოქმედი ძირითადი საფრთხეებია: ჰაბიტატის განადგურება, უკონტროლო ძოვება, ნადირობა სატიხტიხოებზე.