არა ძმაო. ხო ვამბობ, მონადირე-მეთევზე და ნადირობა-თევზაობა, დიაგნოზია, სენი, თანაც უკურნებელი!!! რომელიც ერთხელ დაგემართება და მთელი სიცოცხლე რაც უნდა ეცადო ვერ “მოირჩენ”!
გუშინ, ოზურგეთში, “ავერსის” კლინიკაში გახლდით. ერთ-ერთ ჩემს ახლობელ ადამიანს გადასხმას უკეთებდნენ და იმას “ვბალეშიკობდით”.
კლინიკის შესასვლელთან “ვბაზირებდით” და ველოდებოდით როდის დაგვიბრუნებდნენ “ბაღანას”. 
ზუსტად ჩემს მაღლა, მეორე სართულის ფანჯრიდან მოხუცმა კაცმა გადმოიხედა. გადმოიხედა ხმამაღალი ნათქვამია, რეალურად, ძლივს გადმეიკაკვა ფანჯრის რაფაზე ისე, რომ მხოლოდ თავი გამოჩნდა( ალბათ წელში იყო მოხრილი).
კლინიკის შესასვლელთან თავმოყრილ ხალხში თავის ახლობელს დაუწყო ძებნა თვალებით.
როგორც კი თვალი მოჰკრა მაშინვე დაუძახა: -რა შობი ბიჯო?-  ახლობელმა( იმ მოხუცის კბილა იქნებოდა) გაიგო თუ არა მოხუცის ხმა, მაშინვე ფანჯრის სიახლოვეს მოვიდა და უთხრა:  -რა შობი ძამა? ადექი უკვე? გტკივა ნაოპერაციები?- (მოხუცი რამოდენიმე დღის ნაოპერაციები ყოფილა და იმ წუთას ადგა ფეხზე)
- კი ავდექი, აბა ამდენ ხანს ლოგინში რა გამაჩერებს ბიჯო?  გუშინ, ვალოდიე ყოფილა ჩოლოქზე, თებზიაო ქვეყანა.
ნაოპერაციებმა მოხუცმა პირველი რაც იკითხა და რაც აინტერესებდა ეს იყო თევზაობა!

-კი გევიგე მაი ამბავი, მითხრენ მეც და მივალ იალონზე. ისე, დენით თუ არ მოსპობენ ძამა, თებზის მეტი რაია?! ექიმები გიშლიან მარა ჩუმათაი გამოგიგზავნი ახალ თებზს ძამა!- დააიმედა ახლობელმა.

-უფ, მიშლიან თვარა ვიშლი მეც! რა იციან ამ აბდალა ექიმებმა რა მომარჩენს და რა მომიხთება მე?!- უპასუხა მოხუცმა.
ამის შემდეგ, ახლობელი იდგა ქვემოთ და წარსულ თევზაობებს იხსენებდა და უამბობდა ფანჯრის რაფაზე მობღაუჭებულ მოხუცს, რომელსაც ეს წარსული “საქმენი საგმირონი” ათასჯერ ქონდა მოსმენილი და ახლა ალბათ ათასმეერთედ ისმენდა!

მე კი იქვე ვიდექი და ამათი საუბრიდან რა თქმა უნდა  ერთი სიტყვაც არ გამომპარვია!
ყველაფერი მოვისმინე, ყველაფერი ვიგრძენი და ამით ნასიამოვნები ვიდექი და შტერივით ვიღიმებოდი ბედნიერი! გულში ვამბობდი: “ ვახ, თქვენ გენაცვალეთ! გაიხარეთ, ჯიგრები ხართ!”

არა ძმაო. ხომ ვამბობ?! დიაგნოზია, სენი და ავადმყოფობა, თანაც უკურნებელი!
მონადირე-მეთევზეს ცალფეხზე გინდაც ცხვარი ებას მაინც სანადიროდ და სათევზაოდ მიუწევს გული!