ალბათ შეუძლებელია იმის ახსნა, თუ რა ”ძალა” ან რა ”გრძნობაა” ის რომელიც გვაიძულებს ღამით წამოვხტეთ დაფეთებული, იმის შიშით, რომ არიქა ხომ არ დამაგვიანდაო, თუ მოვახერხეთ საერთოდ ჩაძინება. წევხარ ღამე და ”წრიალებ”. არ გაძინებს ხვალინდელ დღეზე ფიქრი. მთელ, ხვალინდელ ნადირობას წარმოიდგენ. თვალ წინ გიდგება შენი საყვარელი სანადირო სანახები. გახსენდება კარგი მომენტები. შენი ჩუბინობის თუ შენი ”ბისკვიტიეს” პროფესორობის. ხოდა ზუსტად ეს ფიქრები, მოგონებები და მომავალ ნადირობებზე ოცნებები არ გაძინებს.
ეს, კარგი გავიგე, მაგრამ ის მთავარი რა არის?, რომელსაც აქამდე მიჰყავხარ. იარაღის და ზოგადად საჭურველის სიყვარული ქართველ კაცს გენში აქვს, მაგრამ მონადირე ხომ ყველა იარაღის მოყვარული არ არის! კარგი, ძაღლებიც ბევრს უყვარს, მაგრამ არც ეს აქცევს მონადირედ ვინმეს.
რა, რა არის, ის მთავარი გრძნობა, რომელმაც ამასწინათ კახეთში იმხელა მანძილი და ისეთი ”საზიზღარი” სავალი გამატარა, რომ ”ჩვეულებრივ” ადამიანს, რომ ეყურებინა მაშინ ჩემთვის, ნამდვილად შეეპარებოდა ეჭვის ჩემს ”ფსიქიკურ დალაგებულობაში” . რაც მთავარია, ის დღე ”უშედეგო” იყო. უშედეგო ”ჩვეულებრივი” ადამიანის თვალით. თორემ მე, მანქანასთან ანუ ”სამშვიდობოს” მოვედი, უსაზღვროდ ბედნიერი. ბედნიერი პირველ რიგში იმით, რომ საერთოდ მოვედი, ხოლო მეორე რიგში ბედნიერი, ჩემი ულამაზესი სამშობლოს, ერთერთი ულამაზესი კუთხის, ულამაზესი ხედების და პეიზაჟების ხილვით ბედნიერი. თბილისში გვიან ღამით, ძალიან დაღლილი დავბრუნდი, რამოდენიმე საათი დავიძინე და გათენებამდე უკვე სხვა კუთხის სხვა სანადიროში ვიყავი.
ხანდახან, როცა ნადირობა ადამიანის შესაძლებლობების ზღვარზე გადის, რადგან დიდ ფიზიკურ დატვირთვას მოითხოვს (ნუ ყველა არა, მაგრამ ზოგიერთი ნადირობა) ხოდა, როცა მთელი დღე ფეხების დასისხლიანებამდე ივლი, სახეს და ხელებს ეკალ-ჯაგებში გადაიკაწრავ და ბოლოს ”ცოცხალ-მკვდარი” მოხვალ მანქანასთან, ერთი ცალი ნანადირევით, ერთი ცალი კაკაბით ან სხვა ნებისმიერი ფრინველით და იმ მონადირეს, რომ ვიღაცა ”ტუგადუმი” ეტყვის ბრაკონიერი ხარო, რისი ღირსია ის ”ტუგადუმი”?? მე გეტყვით რისი ღირსიცაა: მინიმუმ, ისეთ დღეში უნდა ჩააგდო, როგორშიც ილიკო ჩიგოგიძემ ჩააგდო ილარიონა შევარდნაძე, ილიკოს ბლის ქურდობისთვის!!! ეს მინიმუმ!
არხოტიონი მონადირის ცოლის ეს ნათქვამიც სრული ჭეშმარიტებაა:
”ჩემი მტერიაც, დედაო მენადირისა ცოლია.
დაუგდავ თბილი ლოგინი, მთაზე გრილ კლდესა სწოლია,
ჯერ შუაღამე არ არის მას გათენება ჰგონია.”
მოკლედ, მე არ მაქვს პასუხი, იმაზე თუ რა ძალა მეწევა ტყე-მინდორ-ტბა-მდინარისკენ. ერთი კი ვიცი, რომ მონადირე და ნადირობა დიაგნოზია. უკურნებელი სენი! და კიდევ ის, რომ მხოლოდ ბუნებასთან პირისპირ დარჩენილი შეიგრძნობ აბსოლიტურ თავისუფლებას და შეიგრძნობ შენს საკუთარ სამშობლოს მთელი თავისი სიცხადით და სიდიადით!! ჰოდა, თუ არ იცოდა აწი გაიგოს, იმან ვისაც ჩვენი არ ესმის. რომ ჩვენ იმიტომ არ ვნადირობთ, რომ გვშია და ხორცი გვაინტერესებს. გვშია, მაგრამ ჩვენი საკვები ბუნებსათან ურთიერთობაა, ბუნების სიყვარულია, ჩვენი ოთხფეხა მეგობრების სიყვარულია, მონადირე-მეგობრების სიყვარულია!!!
იმ თემას აღარ ჩავუღრმავდები, თუ როგორი მეომრები იყვნენ ძველად მონადირეები. ყველაზე ძლევამოსილი მეფე, დავით აღმაშენებლი რომ თავის სპას ნადირობაში სწრთვნიდა და თუნდაც თანამედროვე სამხედრო სამსახურები, რომ თავიანთ მებრძოლებს ავარჯიშებენ ”ველური ბუნების” პირობებში. პირობებში რომელშიც მონადირეები გამოჯეკილები არიან! და კიდევ იმას, რომ ომის პირობებში, საუკეთესო მზვერავები მონადირეები იყვნენ.
ასე, რომ ”გარემოს დამცველებო” ნამდვილ მონადირეებს ტყუილად ნუ დაგვადანაშაულებთ ბუნების, ფლორა-ფაუნის ”განადგურებაში”. ტყუილად ენის ფხანას, ნამდვილ მონადირეებს დაგვიდექით მხარში და მოგვეხმარეთ ბუნების დაცვაში! გნებავთ ”სამუშაო” კაბინეტებიდან, გნებავთ ონლაინიდან და საერთოდ საიდანაც გნებავთ.
შენი ჭირიმე შენია... ჯამს წვეთიც არ შერჩენია, შეგარგოს ვაზის ნაჟური: ვაჟი ყოფილხარ ვაჟური. . შენ გაიხარე ჩემო გიო. შენს გულს გაუმარჯოს , ასე მამულისა და ნადირობისთვის მუგუზალივით როა გავარვარებული და თოვლში ხეზე შერჩენილი კარალიოკივით რო ანათებს.
ასეა როცა არავის აინტერესებს ნამდვილი მონადირე რას გრძნობს და რითი ცხოვრობს ეს გრძნობა ყოველთვის თან დაგზდევს დღისით თუ ღამით გატეხილი ღამეები სასიამოვნო დაღლილობა და ცარიელი აბგა. ძველების ნათქვამია ნამდვილ მონადირის კარდალაში კვირაში ერთი დგე იხარშება ხორცი დანარჩენ დღეებში მარტო წყალიო,ნამდვილად მასეა გაიხარეთ მონადირეებო
ვებ-გვერდზე გამოქვეყნებული მასალის გამოყენების ყველა უფლება ეკუთვნის საიტი "www.bazieri.ge"-ს ადმინისტრაციას. ამ მასალის (თუ მასალას სხვა რამ არ აქვს მითითებული) ნაწილობრივი ან სრული გამოყენება საიტი "ბაზიერი"-ს ადმინისტრაციასთან წერილობითი შეთანხმების გარეშე ან წყაროს: www.bazieri.ge-ს მითითების გარეშე დაუშვებელია !!!
gogita12 გავიხსენოთ "ბაზიერის" პირველი ტურნირი ❤ 
