ალგეთის ხეობის ფლორა და ფაუნა

მცენარეული საფარი: ხეობაში 2000-ზე მეტი სახეობის მცენარე იზრდება. ვაკეზე 

და ბორცვიან მთისწინეთში გავრცელებულია ჯაგ-ეკლიანი სტეპის მცენარეულობა: 

ძეძვი, გრაკლა, ასკილი, გლერძა, ურცი, მაჩიტა, ძურწა, ურო, შვრიელი. ტუხტი, 

ხეებიდან გვხვდება აკაკი. მთების კალთების ქვემო სარტყელი მუხისა და 

რცხილის ტყეებს უჭირავს, იზრდება ასევე იფანი, ნეკერჩხალი, პანტა და 

მაჟალო. ბევრია შინდი, თხილი, ზღმარტლი, კუნელი, ასკილი. საშუალო სიმაღლის 

მთებში წიფელი ჭარბობს, რომელიც სუფთა კორომებს ქმნის ჩრდ. ექსპოზიციის 

ფერდობებზე. წიფელთან ერთად იზრდება აღმოსავლური მუხა და რცხილა. ამავე 

სარტყელშია აღმოსავლეთის ნაძვისა და კავკასიური სოჭის ტყეები, ფიჭვის 

კორომები, მაღალი ქედების თხემებზე მეორეული სუბალპური მდელოებია. სამხრეთ 

ექსპოზიციის ციცაბო კალთებზე იზრდება კლდის ქსეროფიტული მცენარეულობა.

ცხოველთა სამყარო: ბინადრობს: შველი, გარეული ღორი, დათვი, მგელი, თეთრყელა კვერნა, მაჩვი, კურდღელი, მთის მელა, მთის ბრუცა, თოვლა მემინდვრია. 

ფრინველებიდან: როჭო, შურთხი, კაკაბი, ჯაფარა, მინდვრის მწყერჩიტა და სხვა.

ქვეწარმავლებიდან: ბევრია კუ, ბოხმეჭა, კლდის ხვლიკი, მდინარეებში არის კალმახი, ხრამული, ტობი, შამაია. 

ალგეთის ხეობის ფლორისა და ფაუნის დასაცვად 1965 წელს შეიქმნა ალგეთის სახელმწიფო ნაკრძალი. ხეობაში გავრცელებული აღმოსავლეთის ნაძვი და კავკასიური სოჭი ალგეთის ნაკრძალიდან აღმოსავლეთით ტიან–შანის მთებამდე არ გვხვდება. ალგეთის ნაკრძალი მდებარეობს თრიალეთის ქედის სამხრეთ კალთებზე, მდინარე ალგეთის ხეობაში, დაბალ და საშუალო მთებში. ნაკრძალს 2007 წელს ეროვნული პარკის სტატუსი მიენიჭა.