მანის თქვეფილი და უფრო სწორედ მანანის ბურღულის თქვეფილი არის ძალიან წარმატებული მცენარეული წარმოშობის სატყუარა. მას სიამოვნებით ჭამს კარპისებრთა ოჯახის ყველა წარმომადგენელი (გარდა ჭერეხისა). მისი კონსისტენცია რბილია, წყალში მოხვედრისას მას იოლად შორდება მცირე ნაწილაკები რაც ქმნის თევზისთვის მიმზიდველ მღვრიე "ღრუბელს". მანის თქვეფილი ნემსკავზე დიდხანს ძლებს და მოზელილი პურისგან განსხვავებით იოლად არ ძვრება მას. მისი ქათქათა თეთრი ფერი შორიდან იზიდავს თევზს.
პირადად ჩემს მიერ ეს სატყუარა გამოცდილია: თბილისის ზღვა--თეთრულა, ვიმბა, შამაია; ჯანდარის არხი--თეთრულა, კარჩხანა, ნაფოტა; ბაზალეთი--ვიმბა, თეთრულა, ფრიტა, კარჩხანა; გრემისხევი--ციმორი, ხრამული, კარჩხანა, ქაშაპი, თეთრულა, ფრიტა, კობრი, კარპი; მდ.ხრამის წყალი--ხრამული, წვერა, ვიმბა; ტარიბანა--შამაია, კარჩხანა; მდ.ენგური--თეთრულა, ღორჯო, ვიმბა, ქაშაპი, ფრიტა, ნაფოტა, ტაფელა, კარჩხანა; ჭურია--ღორჯო, ნაფოტა, ფრიტა, ვიმბა, კარჩხანა, ტაფელა. 
მანის თქვეფილის დამზადება შეიძლება როგორც სახლში ასევე თევზაობისას ნაპირზე. მე პირადად სახლში ვამზადებ რამოდენიმე პლასტიკის შპრიტცში შეკეთებულ, სხვადასხვა არომატიზატორით გაჯერებულ თქვეფილს და საყინულეში ვინახავ. თევზაობის ადგილას მისვლამდე მანის თქვეფილი ლღვება და გამოყენებისთვის მზათაა.
შემოგთავაზებთ მანის თქვეფილის დამზადების ეტაპობრივ, ილუსტრირებულ მეთოდს:

1) ავიღოთ მანანის ბურღული, სუფრის კოვზი, კარაქის დანა, ერთჯერადი პლასტიკის ჭიქა და პლასტიკის შპრიტცი.

2) ჩავყაროთ ჭიქაში 2 სუფრის კოვზი ბურღული (სადღაც 20 გრამი)

3) დავასხათ წყალი ისე რომ ბურღულს ოდნავ ფარავდეს.

4) დავამატოთ 1-2 წვეთი ატრაქტანტი. 

5) მოურიოთ.

6) დავდგათ 15 წუთით ბურღულის გაჯერებისთვის.

7) შეუგდეთ აქტიურ თქვეფას 10-15 წუთი

8) უნდა მივიღოთ ძლიერ წელვადი კონსისტენცია.

9) მოვამზადოთ პლასტიკის შპრიტცი.

10) შევაკეთოთ თქვეფილის მასა შპრიტცში.

11) გამოვტუმბოთ ზედმეტი ჰაერი.

12) მოვიმარჯვოთ ნემსკავი და დავახვიოთ მასზე თქვეფილი.