მოვიდა და მოგუგუნდა, კარს მოგვადგა კალანდის მეკვლესავით, მოკაკული საჩვენებელი თითით მოგვიკაკუნა ნეკნებზე და შემოგვძახა: ეჰჰეეი თქვენ მანდ, რომ ფაციფუცობთ წიწილა დაკარგული კრუხივით, ხომ ხედავთ მუხლებზე ხავსი გადაგკვრიათ და თვალზე ბინდი, ერთ ადგილზე ბოლთას სცემთ, თუ არ სცემთ და საერთოდაც გძინავთ ზეზეულად, მზის სხივი თქვენს კისერს არ დადებია კრამიტად და მკერდს უმალ ჩაუხურავთ ცუდი მასპინძელივით, ვიდრემდის სტუმრად მოსულ ცუღლუტ ნიავს შეეგებებით, ფეხის გულით არ შეგიგვრძნია მიწის ფეთქვა და ხელის გული არ დაგიდვია ძაღლისთვის თავზე, არადა მარტის შემდეგ გელოდება, შენ კიდევ დღითიდღე ცივად ექვეცი, მონადირის აბგა თაგვებს დაუჭმია, მოდუნებას კიდევ შენი ტყვიაწამლის ყუთისთვის მიუგნია და შენი კარგად მოხუფული შარშანდელი სეზონის მოგონებები გაუზიდია დავიწყების ბუნაგში, წადი ხელი მაინც შემოჰკარი ბეჭებში შენს სანადირო ჟილეტს, რაიცი და რა ხდება, იქნებ ავარდნილმა მტვრის კორიანტელმა ნესტოებში შეგიღიტინოს და ისეთი დააცემინო რომ მოფხიზლდე და გონს მოეგო.შენს ხელებს დაჰხედე, ხედავ როგორი მოვლილია?? ერთი ეკლისა და ძეძვის კლანჭიც კი არ ეტყობა, სად გაქრა ვარსკლავებით მოკირწყლული ღამის ანარეკლი შენს თვალებზე? ღამით ისე გძინავს რომ სიზმრებმაც მიგატოვა.არგესმის ადამიანო? შენ გეუბნები შენ!!! მოვედი მოვგუგუნდი ხომ ხედავ, ადექი, აალაგე შენი კარგად დაკეცილი კუნთები და მდინარის წყალში კარგად გარეცხე, რათა ცხიმის ლაქებივით დაფენილი სიზანტე მოაშორო, შემდეგ თაკარა მზეს შეუდგი შუაცეცხლზე გამოსაშრობად. ყველაფერთან ერთად ყურთასმენაც დგღლია, არადა ისეთი მარდი სმენა გქონდა კარგი მწევარივით ეწეოდა ბგერებს...
კაკკუ კაკუ... არის აქ ვინმე???
გახსოვს გასულ წელს რომ გესტუმრე? ხელი დამსტაცე და შენს ნაცნობ მინდვრებში გამარბენინე... როგორ გიხაროდა?! თითქოს 14 წლიდან ერთად არ დავდიოდეთ მინდორ მინდორ, გახსოვს პირველივე მინდორთან რომ გაჩერდი და ზეცის უსასრულობაში გაისროლე? ეს ჩვენი დაღუპული მონადირეებისო რომ თქვი გულში, მეორეც რომ მიაყოლე და ეს კიდევ ჩვენი ოთხფეხა უღალატოებითვისო, ეგეც გულში მაგრამ მე რას გამომაპარებ, მე გულის ყური ცალკე მაქვს და ისე ყური ცალკე, პირველივე აფრენილ მწყერზე რომ თოფი დაუშვი ის თუ გახსოვს, ჩოჩორიაო რომ თქვი და მთელი წლის ნაგროვები ენერგია ისე გადაყლაპე თითქოს ყელი ჩაგეკოკლოზინებინოს, ეხლა კი რას გევხარ, უფრო სწორი იქნება გითხრას კაცმა დევხაროო. არანაირი ემაოცია, ჩამი ჩუმი არ ისმის შენი მკერდიდან გარდა გულის ერთ რიტმში ხვრინვასა....
გამოფხიზლდი, ხომ ხედავ თან სათიბების სუნი მოგიტანე...
ვებ-გვერდზე გამოქვეყნებული მასალის გამოყენების ყველა უფლება ეკუთვნის საიტი "www.bazieri.ge"-ს ადმინისტრაციას. ამ მასალის (თუ მასალას სხვა რამ არ აქვს მითითებული) ნაწილობრივი ან სრული გამოყენება საიტი "ბაზიერი"-ს ადმინისტრაციასთან წერილობითი შეთანხმების გარეშე ან წყაროს: www.bazieri.ge-ს მითითების გარეშე დაუშვებელია !!!
gogita12 გავიხსენოთ "ბაზიერის" პირველი ტურნირი ❤ 
